Kryetarja e Kuvendit të Kosovës, Albulena Haxhiu, me rastin e Ditës së Komunitetit Ashkali dhe Ditës së Flamurit të tyre, ka mirëpritur sot në Kuvend deputetin Artan Asllani, i shoqëruar nga përfaqësues të nivelit qendror e lokal, si dhe aktivistë të komunitetit Ashkali.

Gjatë takimit, Haxhiu theksoi kontributin e çmuar të komunitetit Ashkali në shoqërinë dhe shtetin e Kosovës, duke vlerësuar angazhimin e vazhdueshëm të përfaqësuesve dhe aktivistëve të tij si një shtyllë e rëndësishme për zhvillimin, bashkëpunimin dhe forcimin e barazisë në vend.

“Sot, me rastin e Ditës së Komunitetit Ashkali dhe Ditës së Flamurit të tyre, mirëprita në Kuvend deputetin Artan Asllani, të shoqëruar nga përfaqësues të nivelit qendror e lokal dhe aktivistë të komunitetit Ashkali. Në këtë takim theksova kontributin e komunitetit Ashkali në shoqërinë dhe shtetin tonë, si dhe angazhimin e përfaqësuesve dhe aktivistëve të tij, që është shtyllë e rëndësishme e zhvillimit dhe bashkëpunimit në vend”, ka shkruar ajo në ‘Facebook’.

Haxhiu tha se bashkë reflektuan mbi sfidat me të cilat përballet komuniteti dhe mbi mënyrën se si, duke bashkëpunuar, i kapërcejmë së bashku.

“Diversiteti dhe bashkimi nuk janë thjesht forca jonë si shoqëri, por forca e vetë Republikës. Si Kryetare e Kuvendit, falënderova deputetin dhe përfaqësuesit për angazhimin e tyre dhe kujtova se, krahas përpjekjeve të ekzekutivit për të mbështetur komunitetin edhe Kuvendi do të vazhdojë të jetë i përkushtuar për barazi dhe mundësi të barabarta për të gjithë, veçanërisht për komunitetet joshumicë.Urime Ditën e Flamurit dhe Ditën e Komunitetit Ashkali për të gjithë qytetarët e këtij komuniteti”, tha ajo.